Насельніцтва Беларусі працягвае скарачацца. Улады агучылі маштабы праблемы (але ёсць умоўна пазітыўная навіна па Мінску)

За 2024 год насельніцтва Беларусі скарацілася амаль на 47 тыс. чалавек. Гэта вынікае са звестак, апублікаваных Белстатам. Толькі ў Мінску за мінулы год колькасць насельніцтва вырасла.

Насельніцтва Беларусі на 1 студзеня, паводле афіцыйных звестак, склала 9 109 280. Гэта на 46 698 менш, чым год таму.

Для параўнання, за 2023 год краіна страціла амаль 45 тысяч жыхароў, а самае хуткае скарачэнне адзначаецца ў Віцебскай вобласці. У апошнія гады нашая краіна сутыкнулася з рэзкім спадам насельніцтва. Самы вялікі скачок быў у 2021 годзе, калі колькасць жыхароў зменшылася адразу на 94 тысячы чалавек.

Як у 2024 годзе змянілася насельніцтва па абласцях і ў сталіцы:

• Брэсцкая вобласць — мінус 8657 чалавек;
• Віцебская вобласць — мінус 9848 чалавек;
• Гомельская вобласць — мінус 10 644 чалавекі;
• Гродзенская вобласць — мінус 7676 чалавек;
• Мінская вобласць — мінус 3932 чалавекі;
• Магілёўская вобласць — мінус 9809 чалавек;
• Мінск — плюс 3868 чалавек.

За пяць гадоў (то-бок з 2020-га), паводле афіцыйных звестак, нашая краіна страціла 300 979 чалавек. А з 2000-га — 893 255.

Складанасці з падлікамі і альтэрнатыўныя звесткі па колькасці насельніцтва

Аднак афіцыйная статыстыка не ўлічвае вялікай колькасці людзей, што пакінулі краіну. Гэта звязана са складанасцямі ўліку тых, хто з’язджае.

Паводле некаторых звестак, з улікам вялікай хвалі міграцыі пасля 2020 года колькасць насельніцтва Беларусі ўжо можа быць ніжэйшая за 9 млн. Да такой высновы прыйшлі эксперты па пытаннях дэмаграфіі BEROC. Таксама такую выснову можна зрабіць зыходзячы са звестак непублічнага дакумента, які трапіў у распараджэнне аб’яднання былых сілавікоў BELPOL.

Паводле розных ацэнак, за апошнія гады Беларусь пакінулі сотні тысяч чалавек. МУС Беларусі заяўляла, што толькі ў 2021−2022 гадах з’ехала больш за 200 тысяч чалавек. У кастрычніку 2023 года намеснік міністра ўнутраных справаў Мікалай Карпянкоў ацаніў агульную эміграцыю ў 350 тысяч. У іншых крыніцах фігуруюць ацэнкі ад 100 да 500 тысяч чалавек, што пакінулі краіну з 2020 года.

Тым не менш беларускія чыноўнікі настроеныя аптымістычна: яны спадзяюцца, што ў 2030 годзе колькасць насельніцтва Беларусі будзе складаць 9,1 млн чалавек.

Чытайце таксама